Mesazhi i fundit i ambasadës amerikane në Tiranë ka shkaktuar tepër konfuzion mes ndjekësve të politikës në vend. Sepse një lavdërim i papritur për liderin e PD-së, Luzim Basha, bie ndesh kryekëput me qëndrimet që selia e rrugës së Elbasanit ka mbajtur prej disa muajsh. Ato krijojnë perceptimin e një konfuzioni të madh, për një politikan që Arvizu dikur e quante “Yll në ngritje të politikës shqiptare”, ndërsa shumë kohë më pas Donald Lu e anatemonte si njeriun që mban peng miratimin e reformës në drejtësi.
Historia po përsëritet. Që kur opozita vendosi të marrë vendimet e forta për djegien e mandateve, organizimin e protestave të dhunshme dhe më pas bojkotmin e 30 qershorit, Basha është vizatuar si delja e zezë e krizës vendase. Me një sens të theksuar për t'u përzierë në çorbën lokale, ambasada e SHBA u bëri thirrje deputetëve të PD-së mos u bindeshin liderëve të tyre për djegien e mandateve. Pastaj ajo i inkurajoi kandidatët e listës të bëheshin pjesë e kuvendin legjitim, duke tradhëtuar liderët. Etiketimet se “Basha po tradhëton zgjedhësit e tij”, se “po cënon rrugën euroatlantike të Shqipërisë dhe të ardhmen e vendit”, u bënë konsante e deklarimeve të ambasadës.
Më e nxehtë u bë situata kur në lojë u fut edhe Mathew Palmer. Pas protestave me zjarr dhe Molotov ai ta: “Dua të jem shumë i qartë me Z. Basha, Znj. Kryemadhi dhe të tjerë në partitë e tyre: nëse në protestat e ardhshme ka akte dhune, për ne ata do të jenë përgjegjësit”. Ai u kujdes të nënvizojë se rruga e ndjekur nga liderët e opozitës “dëmton përpjekjet e Shqipërisë për reforma demokratike si dhe perspektivën e vendit për të ecur përpara në rrugën drejt BE”. Madje ai e shpuri në ekstrem kërcënimin për Bashën kur gjatë një interviste për Zëri i Amerikës lëshoi bombën: “Pengimi i zgjedhjeve mund të përbëjë bazë për t’u përjashtuar nga marrëdhëniet me Shtetet e Bashkuara”.
Këtë mesazh u përkujdes ta përforconte edhe ambasada në Tiranë, të cilës i rodhi në media një lajm, se një përfaqësues i sai i kishte përcjellë mesazhin liderit demokrat për mosprishjen e zgjedhjeve: “…zv.Shefi i Misionit në Detyrë i Ambasadës Amerikane, Daniel Koski ka bërë një paralajmërim të fortë. “Çdo akt dhune nga sot deri në 1 Korrik, i bërë apo nxitur nga ju, do ta detyrojë Departamentin e Shtetit t’iu klasifikojë si organizata të dhunshme!”.
Pra po t'i lexosh nga optika e sotme, Lulzim Basha është lider i një organizate në pragun e etiketimit si e dhunshme, një udhëheqës që ka tradhëtuar elektoratin e vet, që po kompromenton rrugën e Shqipërisë drejt BE, që është përgjegjës për dhunën dhe i padëshiruar për SHBA-në.
Por ka mjaftuar një pjesmarrje qesharake e një eksperti teknik të PD-së, dhe vendimi i Bashës për t'i bindur aleatët e tij që kjo të ndodhë, që ai të pikturohet krejt ndryshe nga selia e rrugës së Elbasanit. Në një komunikatë, ajo ka përshëndetur "kryetarin e Partisë Demokratike, Lulzim Basha, që thirri një takim të opozitës dje. Përpjekjet e tij demonstrojnë udhëheqësi të vërtetë mbi një çështje thelbësore për forcimin e mëtejshëm të institucioneve demokratike të Shqipërisë”.
Se çfarë lidershipi tregohet duke shpënë një ekspert teknik në një tryezë formale, këtë mund ta shpjegojnë vetëm ata që e kanë formuluar. Por pyetja kur lexon këtë konstatim ngrihet: “Cili është Lulzim Basha i vërtetë sipas amerikanëve, njeriu i aftë për udhëheqësi, apo ai politikani i dhunshëm që ka braktisur zgjedhësit e vet”.
Por ndoshta përpara se të përplasim kokën për t'i dhënë shpjegim këtij ambiguiteti, është mirë të shtrojmë një pyetje tjetër: Mos ndoshta ambasada ia ka futur kot edhe kur na ka vizatuar Bashën e zi, edhe kur po pikturon variantin e tij të bardhë? A mos i kërkojmë shumë duke pretenduar parimësi dhe koherencë, kur ajo lëshon vetëm formula diplomatike për të zgjidhur hallet e çastit?
©Lapsi.al
