Sheshi qendror i kryeqytetit, ai “Skënderbej”, “Nënë Tereza” dhe zona e Stacionit të Trenit u mbipopulluan me qytetarë në panik, nga frika se Tirana mund të goditet nga një tërmet shkatërrues orët në vijim. Mijëra banorë, fëmijë, burra, gra dhe të moshuar kanë lënë shtëpitë e tyre dhe i janë drejtuar shesheve të Tiranës për të minimizuar pasojat. 
Gjithçka erdhi pas paralajmërimeve në rrjetet sociale se rreth orës 23:30 Tirana do të goditej nga një tërmet 6 ballë, ndërsa lëkundjet e orës 22:10 perforcuan informacionin e përhapur në Facebook.
Ndërsa fotoja poshtë i përket “Unazës së Madhe” të Tiranës. Vargu i automjeteve me njerëz të cilët po lënë shtëpitë e tyre nga alarmi i tërmeve të fuqishme.
Qeveria, kryeministri Edi Rama dhe Ministria e Mbrojtjes e kanë quajtur të rremë njoftimin e shpërndarë në rrjetet sociale dhe më pas të kthyer në lajm nga disa portale.
Policia e Shtetit bëri të ditur se ka ngritur një grup të posaçëm hetimor për të bërë zbardhjen e plotë dhe autorësinë e lajmit qe shkaktoi panik, tek qytetarët. “Policia e Shtetit ka ngritur nëj grup të posaçëm hetimor për të bërë të mundur zbardhjen e plotë të autorësisë së këtij lajmi dashakeq që krijojë frikë e panik tek qytetarët. Policia e Shtetit ju bën thirrje qytetarëve që të ruajnë qetësinë dhe të mos bien pre e njoftimeve dashakeqe dhe siguron ata se cilido që do përhapë njoftime të tilla do të përballet me forcën e ligjit' njoftoi policia.
©Lapsi.al
