E gjithë qeveria u ngrit në këmbë duke akuzuar një segment të mediave të reja, për të justifikuar një përzjerje deliri dhe frike që kaploi të dielën në darkë me dhjetra mijëra qytetarë. Vërshimin e tyre irracional në rrugët dhe autostradat përreth Tiranës, tmerrin e nxitur nga një dalldi kolektive kryeministri, ministrja e mbrojtjes edhe ai i rendit e panë si pasojë e dy reporterëve të ngratë që policia shkoi ti ndalonte në mes të natës.
Sipas gjithë kupolës së rilindjes, fakti që një popull i tërë, i shumëzoi me zero vitet e arsimimit, orët në klasat e shkencave ekzakte, dokumentarët e eksplorerit dhe filloi të besonte se tërmetet qenkërkan të parashikueshëm, ishte mëkati i disa mediave on line.
Lexo me tej:
Fotot e panikut/Frika nga tërmeti mbushi rrugët e Tiranës
Natyrisht, kolegët tanë nuk qenë pa faj. Ata janë viktima të një sistemi të ngritur gabim ku diktatura e shpejtësisë ka bërë të harrohet saktësia. Ata janë pre e redaksive të varfëra, që punojnë me pak gazetarë, sepse portalet janë të vetmet media të taksuara egërsisht nga kjo qeverisje. Ata janë ‘bisha” në një luftë të egër mbijetese, ku informimi i drejtë dhe i ndershëm kalon në plan të fundit.
Si të tillë, shpesh më shumë se nga ligësia, Fake News prodhohen nga padituria dhe mungesa e profesionalizmit. Kjo është koha që të gjitha mediat e reja, përfshirë edhe ne të Lapsit, të shohim nga vetja, të mëtojmë standarte të reja dhe të kërkojmë falje sa herë nuk jemi gjendur në lartësinë e misionit tonë.
Por, prej këtu, të arish të abstragosh siç bën qeveria, se paranoja çmendurake që kaploi të dielën në mbrëmje mbarë Tiranën ishte e nxitur nga mediat, është qesharake. Madje tentativa e Ramës për të parë në këtë gjurulldi, një akt kriminal që tentonte të nxiste panik është po aq marrëzi sa ajo e çdo burri që rendte mbrëmë mbi trotuare me kanotjere dhe brekë fanellate.
Nëse këto media anti qeveritare do të kishin këtë fuqi në publik, nëse ato do të kishin pasur një të qindën e forcës për këtë shplarje truri kolektive, ne nuk do të ishim duke dëgjuar ende sot broçkulla si këto të kryerilindasit. Do qemë çliruar me kohë nga marrëzitë që transmeton pafundësisht ERTV.
Po atëherë, kur dalldia e djeshme nuk mund të shkaktohej nga disa lajme online, përse Rama nxitoi ta vërë gishtin mbi to?
Përgjigjja mund të jetë e komplikuar. Ajo mund të lidhet me paranojën e një lideri të sëmurë që nuk e shpjegon dot ngritjen e turmave jashtë kontrollit të tij. Ajo mund të shpjegohet me vetembrojtjen automatike për të larguar përgjegjësinë nga vetja. Ajo mund të justifikohet me tentativën për të fshehur mungesën e përgatitjes së shtetit.
Por, mbi të gjitha, është e mundur se ajo ka të bëjë me një sjelle tashmë të shndërruar në instikt tek rilindja: atë për të gjetur në çdo ngjarje një armik. Aktivizimi i menjëhershëm i këtij instikti e shty Ramën të denonconte një strategji kriminale, që kishte si qëllim të paramenduar panikimin e popullsisë. Ajo i bëri dy nga ministrat më të rëndësishëm të qeverisë të përsërisnin të njëjtin refren bajat.
Në thelb, ajo është e ngjashme me mënyrën si janë sjellë rilindasit pas çdo ngjarje të madhe që ka ndodhur në këtë vend. Edhe kur kapet një vjedhje qindra milionshe e një koncesioni, armiku është opozita që do të nxijë imazhin e vendit edhe kur plas një skandal, fajin e kanë mediat e kazanit që e fryjnë raportimin edhe kur kapet drogë në Holandë, fajin e kanë holandezët që ekzagjerojnë, kaundër nesh, një zanat të cilin e kanë ngritur në mjeshtëri vetë, edhe kur një rilindas përdhunon një vajzë, fajin e ka Berisha që zbulon identitetin e viktimës.
Pikërisht ky mekanizën i identifikimit të një armiku, u vu në lëvizje edhe pas dalldisë kolektive që kaploi kryeqytetastit mbrëmë. Raporti absurd i një dashurie urrejtje me armikun e radhës, pa të cilin tashmë nuk mund të jetojnë, i nxiti automatikisht rilindasit ta arsyetojnë rendjen marroke të njerzëve dhe automobilëve në mes të natës, me fake news që prodhuan dy reporterë.
Dhe këtu, absurdit kolektiv i mbishtohet edhe absurdi i pushtetit. Sepse sikur mos mjaftonte pashpjegueshmëria e komportimit primitiv të një pjese të popullatës, Rama do të na bëjë të besojmë, se ajo u shkaktua nga mediat armike që patën si qëllim të ngjallnin panik.
©Lapsi.al
