Ministri i Jashtëm iranian, Mohammad Javad Zarif, paralajmëroi se çdo sulm ushtarak amerikan ose saudit në Iran do të rezultojë me një “luftë të përgjithshme”. Zarif e bëri deklaratën në një intervistë për rrjetin televiziv CNN.
Sekretari amerikan i Shtetit, Mike Pompeo, e quajti sulmin e fundit të telekomanduar mbi objektet e naftës saudite një “akt lufte”.
SHBA-ja akuzon Iranin se qëndron pas sulmit, por Teherani e mohon. Përgjegjësinë për sulmin e së shtunës u morën rebelët Huthi nga Jemeni, duke deklaruar se ata e bënë këtë, për shkak të një ndërhyrje shumë-vjeçare saudite në Jemen që la dhjetëra mijëra të vdekur.
Sidoqoftë, disa ekspertë i kanë thënë Associated Press se raketat e përdorura në sulm nuk kishin varg të mjaftueshëm për të arritur objektivat e synuara nga Jemeni.
