Votimet për zgjedhjet parlamentare në Izrael nuk kanë nxjerrë ende një parti fituese. Nga numërimi i 90% të kutive të votimit deri në orën 06:30, Partia “Likud”, e drejtuar nga kryeministri në detyrë, Benjamin Netanyhau, rezulton të ketë siguruar deri më tani 32 vende në Parlament, po aq sa edhe rivalët e Partisë “Blue and White”, të drejtuar nga Benny Gantz.
Projeksionet e para parashikojnë që deri në fund të procesit të numërimit, dy partitë kryesore të kenë një diferencë të papërfillshme në avantazh ndaj njëra-tjetrës me vetëm një ose dy mandate, duke mbetur sërish larg objektivit të arritjes së 61 mandateve që duhen për të formuar mazhorancën parlamentare.
Në këto kushte, i takon Partisë “Yisrael Beytenu”, e drejtuar nga ish-ministri i Mbrojtjes, Avigdor Liberman, që do të luajë rolin e “kingmaker”-it dhe që do të përcaktojë qeverinë e re izraelite. Kjo parti renditet e katërta me 9 mandate të fituara.
Në vend të tretë me 12 mandate është pozicionuar “Lista e Përbashkët”, një koalicion me parti arabe dhe izraelite, me të cilat Netanyhau refuzon bashkëpunimin.
