Me 155 milionë dollarë të arkëtuar nga biletat në SHBA dhe 323.3 milionë në mbarë botën, brenda vetëm dy javëve të para të shfaqjes në kinema, “It: Chapter Two” duket se do t’i kapërcejë të gjithë filmat e tjerë “It” në Box Office.
Forbes parashikon që filmi i ri, me protoganistë aktorët e famshëm, Jessica Chastain, eJames McAvoy do të grumbullojë gjithsej 560 milionë dollarë brenda kufijve amerikanë e 1 miliardë në të gjithë globin. Përshtatja në ekran e romanit të vitit 1987 nga Stephen King e vazhdon kështu dominimin ndërkombëtar, ndërsa mediat vendase shkruajnë se skenaristi dhe regjisorit Andy Muschietti nuk i mungojnë idetë edhe për një film të tretë.
Adhuruesit e Stephen King janë dyndur në kinema për të marrë emocionet e radhës nga kllouni Pennywise në “It: Kapitulli 2.”
Filmi sheh “Klubin e Humbësve” të kthehen së bashku për ta shkatërruar Pennywise një herë e përgjithmonë. I konsideruar si një prej filmave horror më të frikshëm të të gjitha kohërave, rikthimi i kllounit që ushqehet me makthet e fëmijëve e fshihet në gjirize, ishte pritur me padurim nga fansat, të cilët kanë mundësinë të ndjekin vazhdimin e ngjarjeve pas 27 vjetësh, ndërsa janë shoqëruar gjatë gjithë kohës nga paralajmërimet se ky film, do të ishte edhe më i frikshëm se paraardhësi.
