Ylli i grupit të njohur muzikor “Little Mix”, Jesy Nelson ka zbuluar se dikur është përpjekur të vetvritej pas talljeve të vazhdueshme që i bënin për paraqitjen e saj.
Këngëtarja 28-vjeçare, ka folur hapur për përvojën e saj të trishtë në dokumentarin e ri në BBC, “Jesy Nelson: Odd One Out”.
Ylli i muzikës zbuloi se në kulmin e talljeve dhe ngacmimeve, pas fitores së grupit në X Factor në vitin 2011, ajo mori një mbidozë, por u shpëtua nga i dashuri i saj në atë kohë.
Duke folur për periudhën më të keqe që ka kaluar, Jesy tha se në atë kohë mendonte t’i jepte fund çdo gjëje.
“Mendoja: ‘Vetëm kam nevojë që të largohet e gjitha kjo, duhet t’i jap fund'”.“Mbaj mend që shkova në kuzhinë dhe mora shumë pilula. Pastaj shkova në shtrat dhe vazhdoja të mendoja: “Le të ndodhë. Shpejto”.
Ajo më pas i tregoi të dashurit se çfarë kishte bërë dhe një ambulancë nxitoi për ta marrë menjëherë.
Familjarët e saj, një anëtar i ekipit të saj drejtues dhe shoqet e grupit “Little Mix” u tronditën kur e morën vesh.
Filmi dokumentar tregon gjithashtu se bukuroshja brune luftoi aq shumë me varësinë ndaj drogës që ndikoi në shëndetin e saj mendor dhe kishte probleme të vazhdonte angazhimet e saj me grupin e vajzave.
