Koalicioni qeveritar i ri i Italisë, lidhur mes Partisë Demokratike të qendrës së majtë dhe lëvizjes populiste “Cinque Stelle” bëri betimin procedurial në Presidencë, në tymnajën e dyshimeve në lidhje me jetëgjatësinë e tij.
Me krijimin e këtij ekzekutivi, mori zgjidhje kriza që përshkoi vendi pas përpjekjes së ish-ministrit të Brendshëm dhe kreut të “Lega”-s, Matteo Salvini për të marrë pushtetin duke rrëzuar koalicionin me “5 Yjet”.
Kryeministri që rimori detyrën në më pak se dy javë, Giuseppe Conte, i prezantoi presidentit Sergio Matarella emrat e ministrave të rinj, si dhe programin e qeverisë së porsaformuar që do të përballet më së pari me çështjen e buxhetit për vitin 2020, që të paraqitet në parlament deri në fund të shtatorit.
Ky është kabineti me më shumë prurje në historinë e Italisë së pasluftës, me një moshë mesatare që përllogaritet të jetë 47 vjeç. Gjithashtu, në përbërje të tij numërohen më shumë ministra nga jugu, i dalluar për nivelin e ulët të jetesës.
Në mesin e 21 ministrave, 9 janë nga radhët e PD-së, 10 nga Lëvizja “5 Yjet” dhe dy nga parti të vogla. Në vendin e Salvinit në krye të Ministrisë së Brendshme, do të qendrojë një ish-shefe sigurie në Milano, Luciana Lamorgese, një prej themeluesve të PD-së. Ndërsa, Roberto Gualtieri shkon në krye të Ministrisë së Ekonomisë dhe Financave dhe Luigi di Maios i kalon portofoli i Ministrisë së Jashtme.
Sipas Salvini-t, krijimi i kësaj qeverie të këtij lloji është politikisht e papranueshme, sepse po lidhet një partneritet mes një force anti-sisitem dhe një partie tradicionale, duke u mohuar italianëve të drejtën demokratike për të zgjedhur përfaqësuesit e tyre përmes votës.
Nëse koalicioni dështon, të dyja këto forca politike do të ndëshkoheshin me zgjedhje të parakohshme, duke përmbushur pritshmëritë e Salvinit.
