Kevin Hart u aksidentua rëndë me automjetin e tij të dielën në mëngjes në Malibu. Në media u raportua se gjendja e yllit të filmave komedi ishte tejet e rëndë, ndërsa Hart iu nënshtrua edhe një operacioni në shtyllën kurrizore.
Por vetëm një ditë pas operacionit, gruaja e tij Eniko qetësoi fansat duke thënë se ai do të shërohet dhe do të jetë mirë.
“Ai është mirë. Do të bëhet mirë”, tha ajo për TMZ e pyetur nga mediat jashtë spitalit.
Sipas autoriteteve, 40-vjeçari ishte pasagjer në makinën e tij Plymouth Barracuda 1970, kur ajo doli nga rruga dhe u përmbys. Shoferi 28-vjeçar Jared Black, pësoi gjithashtu dëmtime të shtyllës kurrizore, ndërsa pasagjerja tjetër, Rebecca Broxterman, kishte vetëm dhimbje dhe plagë të lehta.
