Ish-kryeministri italian, Giuseppe Conte, ka pranuar marrjen e një mandati të ri për formimin e një koalicioni qeveritar mes Partisë Demokratike të qendrës së majtë dhe populistëve të Lëvizjes “5 Yjet”, një javë pas rrëzimit të kabinetit të dominuar nga nacionalistët.
Conte është shprehur pas konfirmimit të përzgjedhjes së tij në të njëjtën detyrë, se Italia duhet të luante një rol kryesor në Evropë, duke rënë ndesh me politikat e djathtistëve të “Lega” së drejtuar nga Matteo Salvini, i cili shkaktoi edhe kolapsimin e koalicionit të mëparshëm.
Conte, një profesor i pavarur, e akuzoi Salvinin në seancën parlamentare të javës së kaluar kur komunikoi edhe dorëheqjen, për krijimin e një krize politike për “interesa personale dhe partiake”. Pasi presidenti Sergio Mattarella, i dha atij mandatin për të formuar një koalicion të ri, Conte tha se Italia duhej të kompensojë kohën e humbur pasi gjendej në një “fazë shumë delikate”.
“Do të jetë një qeveri për të mirën e qytetarëve, për të modernizuar vendin, për ta bërë kombin tonë edhe më konkurrues në skenën ndërkombëtare, më mbështetës dhe më gjithëpërfshirës”, tha Conte.
Ndërkaq, Salvini u bëri thirrje mbështetësve të partisë së tij për zhvillimin e një proteste në Romë, më datë 19 tetor. Sipas Salvini-t, krijimi i kësaj qeverie të këtij lloji është politikisht e papranueshme, sepse po lidhet një partneritet mes një force anti-sisitem dhe një partie tradicionale, duke u mohuar italianëve të drejtën demokratike për të zgjedhur përfaqësuesit e tyre përmes votës.
