Nga pamja e paqtë e kopshtit të trëndafilave në Shtëpinë e Bardhë , presidenti i Shteteve të Bashkuara të Amerikës, Donald Trump, paralajmëroi rrezikun e një lufte hapësinore, duke njoftuar krijimin e një ushtrie “të qiellit”.
“Është diçka e madhe. Hapësira është fronti i ardhshëm i luftës dhe unë mendoj se kjo është e dukshme për këdo”, u shpreh Trump, i cili i vetshpallur “armik” i të gjithëve, i druhet kërcënimeve që mund të vijnë përtej planetit.
“Rreziqet për vendin tonë evoluojnë në mënyrë konstante dhe ne duhet të evoluojmë po ashtu. Tani, ata që duan të dëmtojnë Shtetet e bashkuara, kërkojnë të na sfidojnë në hapësirë. Dhe kjo do të jetë një lojë krejt e ndryshme”, shtoi Trump.
Operacionet e komandës hapësinore pritet të përfshijnë edhe mundësimin e navigimit të bazuar mbi satelitët dhe komunikimet për trupat në fushë, duke siguruar paralajmërime për lançime raketash dhe mbrojtje nga ndonjë ndërhyrje e mundshme Rusia apo Kina.
Kreu i Shtëpisë së Bardhë tha se forca hapësinore e SHBA-ve do të krijohet shumë shpejt, si Dega e Gjashtë e Forcave të Armatosura amerikane.
Kjo njësi, që do ti bashkohet ushtrisë, marinës, Forcës Ajrore, Marine Corps dhe Rojës Bregdetare, si shërbim i ndarë, nuk e ka marrë ende miratimin e kongresit, por çështja pritet të diskutohet pas përfundimit të pushimeve verore.
