Presidenti rus, Vladimir Putin, ka shprehur angazhimin e tij maksimal për të parandaluar zhvillimin e një lëvizjeje protestuese të ngjashme me “jelekverdhët” në Francë, duke iu përgjigjur kritiës së homologut të tij francez, Emmanuel Macron, i cili në takimin e së hënës, bëri thirrje që Rusia t’i përmbahet parimeve demokratike, duke iu referuar protestave disa javore në Moskë.
Macron e priti Putin-in në rezidencën e tij verore në jug të Francës, në paraprirje të takimit të kësaj jave të Grupit të 7-shes (Kanada, Francë, Gjermani, Itali, Japoni, SHBA dhne Mbretëri e Bashkuar), për t’i treguar Kremlinit se merret gjithsesi në konsideratë, pavarësisht se është përzënë nga ky grup, pas aneksimit të Krimesë në vitin 2014.
Në fokus të bisedimeve ishin krizat ndërkombëtare, por edhe situata e brendshme në Rusi. Prej më shumë se një muaji, Moska ka qenë "nën ethet" e protestave, që u nxitën pasi autoritetet ndaluan kandidatët e opozitës të konkurtonin në zgjedhjet vendore që do të mbahen në shtator.
“Këtë verë ne bëmë thirrje për liri për të protestuar, për liri të fjalës, mendimit e për të konkuruar në zgjedhje, gjë që duhet të respektohet plotësisht në Rusi si për çdo vend tjetër anëtar të Këshillit të Evropës”, u shpreh Macron gjatë një konference të përbashkët për shtyp përpara takimit.
Nga ana tjetër, Putin shprehu mospajtim ndaj komenti, duke u përgjigjur në mënyrë evazive se situata në Moskë po trajtohej në përputhje me ligjin.
"Ne të gjithë i dimë ngjarjet e lidhura me të ashtuquajturit ‘jelekët e verdhë’, gjatë protestave të të cilëve, sipas llogaritjeve tona, u vranë 11 persona dhe 2500 u plagosën. Ne nuk do të dëshironim që ngjarje të tilla të ndodhnin në Moskë dhe do të bëjmë gjithçka mundemi për të garantuar situatën e brendshme politike dhe çdo veprim ka qenë në mënyrë rigoroze brenda kuadrit ligjor", theksoi Putin.
Në përmbyllje të takimit, të dy presidentët bënë të ditur se do të diskutojnë një seri problemesh ndërkombëtare, sikurse çështjen e Iranit, Sirisë, kontrolli i armëve dhe në mënyrë të veçantë çështja e Ukrahinës, që pritet të sjellë zhvillime pozitive pas ftesës së Volodymyr Zelenskyit për të arritur paqen.
