Presidenti i Shteteve të Bashkuara të Amerikës, Donald Trump, ka dënuar “racizmin, urrejtjen dhe supremacinë e bardhë” në një fjalim pas të shtënave masive që lanë 29 të vdekur në Teksas dhe Ohio.
Ai bëri thirrje për reforma të shëndetit mendor në kontrollin e armëve, si edhe për dhënien fund të dhunës në shoqëri dhe dënimin me vdekje për ata që qëndronin pas sulmeve. “Shëndeti mendor dhe urrejtja tërheqin këmbëzën, jo armën”, u shpreh Trump.
Kreu i Shtëpisë së Bardhë nuk shprehu mbështetje për masat e kontrollit të armëve të propozuara në Kongres. Kujtojmë se 29 persona u vranë në dy sulme gjatë fundjavës. Një sulm në një dyqan Ëalmart në El Paso, Teksas, i mori jetën 20 personave ndërsa nëntë të tjerë humbën jetën në një tjetër sulm në Dayton, Ohio.
Një 21-vjeçar u arrestua në lidhje me sulmin në Teksas dhe besohet se ai kishte postuar online një dokument ku e quante sulmin një reagim ndaj ‘pushtimit’ latin të shtetit. Motivet e autorit të sulmit në Ohio, që vrau motrën e tij dhe tetë persona të tjerë të dielën, para se të qëllohej për vdekje edhe ai nga policia, janë ende të paqarta.
Rasti i fundit, besohet se është i teti më vdekjeprurësi në historinë moderne të SHBA-së dhe ndodhi në një qytet ku pjesa më e madhe e popullatës, ka prejardhje latine. Përveç viktimave, në sulmin në Ëalmart, u lënduan edhe 26 persona.
