Analiza/ Sinjali sekret i Matthew Palmer për Ramën

Të gjithë kritikët e Edi Ramës po tregojnë një entuziasëm të tepruar pas intervistës së Matthew Palmer, Zëvendësndihmës Sekretar i Shtetit për Çështjet e Evropës dhe Euroazisë, dhënë për gazetaren e seksionit serb të Zërit të Amerikës, Jovana Djuroviç. Disa e shohin si një pikë kthese të qëndrimit të SHBA-ve pas 30 qershorit, disa të tjerë si një reflektim për të ruajtur imazhin e një arbitri të panashëm. Në fakt nuk është krejtësisht kështu. Në intervistën e Palmer shihet një tendencë e qartë për të ndarë goditjen e Dakos nga Rama, ndërkohë që në Shqipëri të gjithë e dinë që ata kanë qenë bashkë. "Nuk mendoj se e shohim këtë si çështje të qeverisjes së Kryeministrit", u përgjigj Zëvendësndihmës Sekretar i Shtetit kur u pyet se a ka lidhje rasti Dako me qeverisjen e Ramës. Lexo me tej:

Mesazhet e forta të Palmer për Dakon, Ramën, 30 qershorin dhe krizën politike

Një tjetër pikë ku Palmer renditet përkrah Ramës, është edhe ajo e zgjedhjeve lokale. Pasi gazetarja e pyet se a duhen përsëritur ato, ai dredhon duke thënë se u takon gjykatave shqiptare (në fakt ngatërron Gjykatën e lartë me atë Kushtetuese). Por para 30 qershorit qëndrimi i Zëvendësndihmës Sekretarit të Shtetit ishte i kundërt: Ai i shkoi në favor qeverisë që donte zgjedhje dhe ndërhyri për mbajtjen e tyre, pavarësisht se sot thotë : "Nuk ndërhyjmë".

Andi Bushati: Hipokrizia ndërkombëtare me krizën shqiptare

Megjithëatë, pavarësisht nga këto qëndrime hapur pro mazhorancës, ka një frazë në intervistën e tij që me të drejtë mund të interpretohet edhe rritje e presionit amerikan mbi kryeministrin që vendi të mos rrëshqasë drejt monizmit: "Mendojmë se është shumë e rëndësishme që çdo sistem të ketë kontrollet dhe ekuilibrat e duhur, në mënyrë që të ketë përgjegjshmëri, transparencë dhe respekt për sundimin e ligjit. Ne ia kemi shtruar këto çështje Kryeministrit Rama, siç kemi bërë me paraardhësin e tij dhe si ç’do të bëjmë edhe me pasardhësin e tij". Në këtë frazë, përpos faktit që vihet një shenjë barazimi mes Ramës dhe Berishës, kur dihet se sa të ashpër qenë amerikanët në mbarim të qeverisjes së këtij të fundit, flitet se kryeministrit tashmë i është përcjellë shqetësimi i përtej Atlantikut për pushtet të kontrolluar, të ekuilibruar dhe për sundimin e ligjit. Si dhe në ç'formë i janë përcjellë këto sinjale qeverisë shqiptare? A ka aty një mesazh sekret të panjohur nga publiku? A do rivendoset ekuilibri i kërkuar me presion amerikan apo kjo detyrë i është lënë institucioneve shqiptare? Këto ende nuk dihen. Më optimistët edhe mundet të shpresojnë se nëse intervista e Palmer nuk është thjeshtë propagandë, Edi Ramës i janë lënë detyrat e shtëpisë në tavolinë. Dhe për të vendosur ekuilibrin dhe kontrollin e pushtetit, ato duhet të kalojnë përmes një pakti me opozitën reale. ©Lapsi.al