Këshilli i Ministrave ka akorduar shumën prej 150 milionë lekësh nga buxheti i shtetit i vitit 2019, për Strukturën e Posaçme Antikorrupsion (SPKA), që pritet të ngrihet në shtator.
Sipas ligjit, SPAK-u duhet të ketë 15 prokurorë, të cilët do të hetojnë dosjet ku përfshihen zyrtarët më të lartë shtetërore, por edhe personazhe të botës së krimit. Ndërkohë, gjatë muajit korriku Këshilli i Lartë i Prokurorisë (KLP) pas një gare mes 22 prokurorëve, përzgjodhi 15 kandidatë, pasi shqyrtoi dosjet duke vlerësuar arritjet individuale më të spikatura në hetimin e korrupsionit në vend dhe të krimit të organizuar, si edhe pas fazës së intervistimit.
Nërkohë, deri më tani i janë nënshtruar procesit të vetting-ut vetëm dhjetë prokurorë, të cilët janë konfirmuar në detyrë, ndërsa pesë prokurorët e tjerë do të kalojnë në “filtër” në shtator, kur Komisioni i Pavarur i Kualifikimit (KPK) të rifillojë punimet.
