Vijojnë përplasjet mes Presidencës dhe qeverisë shqiptare, lidhur me shqetësimin e ngritur nga kreu i shtetit, Ilir Meta, lidhur me parashikimin për një tërmet apokaliptik, që pritet të prekë Ballkanin vitin e ardhshëm.
Presidenca i është përgjigjur “flakë për flakë” ministres së Mbrojtjes, Olta Xhaçka, e cila më herët i dërgoi një letër Metës, ku theksonte se “nuk ka asnjë shans që të parashikohen tërmetet”.
I mënjëhershëm ka qenë reagimi i zëdhënësit të Metës, Tedi Blushi duke e quajtur ministen “një papagall të radhës”. Blushi, ka publikuar në llogarinë e tij në “Facebook” deklaratën e një dite më parë të këshilltarit të presidentit, Bahri Shaqiri, në të cilën renditen edhe të gjitha mediet botërore që kanë shkruar për parashikimin e një tërmeti apokaliptik në Ballkan.
“Papagajtë nuk kanë nevojë për fakte dhe as për argumente, ata vetëm përsërisin veten çdo herë. Për ata që kanë dëgjuar sot “zëdhënësen” e re në Shqipëri të z.Tselentis, po u rikujtojmë shkrimet e publikuara në mediat ndërkombëtare dhe kombëtare që i gjeni në linkun më poshtë. Ndërsa për ligjin “Për Mbrojtjen Civile” bën mirë të jetë e informuar se është dekretuar para se të përfundojë afati!”- shkruan Blushi.
