Operacioni Ndërkombëtar i Monitorimit i ka paraqitur Komisionerëve Publikë rekomandimin për ankimimin në KPA të vendimit të konfirmimit në detyrë të kryeprokurorit të Kavajës, Artan Madani.
Në raport OMN shprehet se gjatë hetimit nga Vëzhguesi ndërkombëtar u zbuluan pasaktësi. Sipas OMN prokurori dështoi në gjetjen e burimeve të financimit duke bërë deklarime të pasakta të pasurisë si: një apartament me sipërfaqe 14.646 m2 dhe një garazh me sipërfaqe 10.5 m2 në Durrës.
Vlera, sipas komisionit, në vitin 2001 e apartamentit ishte 5.5 milionë lekë ndërsa në deklarimin e vettingut thuhet se banesa është marrë me një çmim prej 1.700.000 lekë dhe se prokurori pagoi diferencën për të përfunduar vetë ndërtimin dhe filloi të jetonte atje 2 vite më vonë.
Sipas tij burimet e të ardhurave vijnë nga kursimet gjatë viteve dhe shitja e shtëpisë së prindërve të tij në vitin 2000. Ky aset u rivlerësua në vitin 2011 për vlerën 10.933.335 lekë sipas OMN.
OMN shkruan se prokurori e paraqiti ndryshe statusin e banesës, kohën e blerjes dhe çmimin e paguar për pronën në kompaninë e ndërtimit, duke mos dëshmuar:
-që apartamenti ishte i papërfunduar kur bleu
-çmimin që pagoi në të vërtetë
-faktin që banesa u kompletua nga ana e tij
-gjithashtu nuk deklaroi blerjen dhe pronësinë e garazhit në deklaratë
- nuk arriti të provojë legjitimitetin dhe ligjshmërinë e disa prej burimeve për financimin e kësaj prone duke mos dhënë dëshmi bindëse për kapacitetin financiar të secilit prej donatorëve dhe huadhënësve
- nuk arriti të provojë se kishte fonde të mjaftueshme të ligjshme dhe të ligjshme për të financuar këtë pronë
-nuk arriti të tregojë në mënyrë të qartë dhe të saktë në deklaratat periodike të mëparshme burimet për financimin e këtij apartamenti dhe shumat e tyre përkatëse, duke shkelur detyrimin e tij për deklarim të plotë dhe të vërtetë
Prokurori Madani u konfirmua në detyrë nga KPK më 1 korrik.
Komisionerët Publikë, pasi të njoftohen me shkrim për vendimin nga Komisioni i Pavarur i Kualifikimit, do ta shqyrtojnë atë krahas rekomandimit të Operacionit Ndërkombëtar të Monitorimit.
Sipas ligjit, Komisionerët Publikë, brenda 15 ditëve nga data e njoftimit të vendimit nga Komisioni i Pavarur i Kualifikimit, kanë të drejtë të paraqesin ankim pranë Kolegjit të Posaçëm të Apelimit.
