Presidenti i Republikës, Ilir Meta, ka përsëritur sot nga Durrësi mesazhin e djeshëm dhënë në takimin me Sekretarin e Përgjithshëm të Organizatës për Siguri dhe Bashkëpunim në Evropë (OSBE), Thomas Greminger, duke kërkuar që palët politike të marrin përgjegjësitë për të zgjidhur krizën dhe situatën kaotike në vend, në respektim të dekretit presidencial për zhvillimin e zgjedhjeve vendore më datë 13 tetor.
“Kryeministri të lërë presionet dhe shantazhet ndaj institucioneve duke penguar zbatimin e dekretit të presidentit dhe të tjerët të bëhën gati të marrin pjesë në zgjedhjet vendore të 13 tetorit”- tha Meta, duke bërë me dije se ka përgatitur një letër Greminger-it , por edhe kreut të ardhshëm të OSBE-së, në paraprirje të marrjes së kryesimit të kësaj organizate nga Shqipëria.
Duke iu referuar klimës tejet të polarizuar politike, por dhe krizës institucionale në Shqipëri, veçanërisht si pasojë e djegies së mandateve nga opozita e bashkuar joparlamentare, si edhe për shkak të mosfunksionalitetit të Gjykatës Kushtetuese, Meta përsëriti se përpjekjet e tij të vazhdueshme për kapërcimin e krizës së gjithanëshme, janë minuar nga aktorë të ndryshëm.
“Kam insistuar për dialog të qëndrueshëm politik jo për diversion, apo demagogji, por që të rivendoset normaliteti i demokracisë në vend dhe të funksionojë kontrolli e balanca mes pushteteve dhe llogaridhënia. Kemi sot një shumicë që kontrollon gjithçka, një situatë jashtëzakonisht kaotike në gjithë drejtimet dhe kjo është përgjegjësi e palëve politike në vend, nuk shfajëson asnjë edhe opozitën, se opozita i ka pasur të gjithë mundësitë për të parandaluar me propozime me këmbë në tokë e të përgjegjshëm shumë nga marrëzitë që kanë ndodhur në drejtim të skenarit të qartë të kapjes së institucioneve në vend”- është shprehur për mediat kreu i shtetit.
Ndërsa, lidhur me çështjen e Teatrit Kombëtar, Meta tha se është shprehur qartë dhe adresoi një thirrje për Ramën, Bashën dhe Kryemadhin, të cilët i quajti “artistë”, për të mundësuar hapjen e negociatave të anëtarësimit të vendit në Bashkimin Evropian në muajin tetor dhe për zgjidhjen e krizës politike përmes dialogut.
“Besoj jam shprehur qartë dhe në mënyrë të vazhdueshme edhe për padinë ndaj ligjit për Teatrin Kombëtar në Gjykatën Kushtetuese. Por ajo çfarë na shqetëson më shumë është ky teatri politik absurd i cili kërcënon që shqipëria të ketë mundësi të çel negociatat në Tetor. Prandaj ju bëj thirjrje të veçantë 3 artistëve që të marrin të gjitha masat, sepse qytetarët kanë nevojë të kenë qetësi, normalitet dhe qeverisje vendore të ligjshme që jep llogaridhënie për të gjitha shqetësimet e tyre. Zgjedhjet vendore të 13 Tetorit nuk është se zgjidhin gjithçka por është një mnyrë ligjore dhe kushtetuese dhe është përgjegjësi e kryeministrit për t’i pranuar dhe punuar për zhvillimin e tyre.”- përmbylli fjalën e tij presidenti.
