Një nga të plagosurit si pasojë e shpërthimit të transformatorit të tensionit të lartë në austostradën Tiranë-Durrës, ka ndërruar jetë në spitalin e Traumës.
Sipas informacioneve paraprake, shpërthimi ka ndodhur në një objekt në ndërtim dhe viktima së bashku me dy të lënduarit e tjerë, ishin punëtorët e pranishëm në ndërtesë.
Ndërkohë, lidhur me ngjarjen ka reaguar edhe Operatori i Shpërndarjes së Energjisë Elektrike (OSHEE).
Informacioni nga OSHEE
Për shkak të një defekti në linjat e OST të Celësave 110kV në N/stacionin Kashar, sot rreth orës 11:52 kanë mbetur pa energji për rreth 15 minuta, disa zona si bizneset në Autostradë, Mëzez, Vorë e Kamëz.
Nga informacionet në terren, linja u dëmtua nga 2 punëtorë të një firme private që kryenin punime në një objekt pranë Autostradës.
Nga ana e OST u morën masa për furnzimin me linjë alternative të NST Kashar dhe disa nstacioneve të tjera që u stakuan si masë sigurie pas defektit të shfaqur në Celësat 110kV ,
Aktualisht të gjitha zonat kanë marrë energji elektrike.
Ndërkohë OST po punon për zbardhjen e shkaqeve të defektit që ndodhi sot në mesditë.
