Artistët e kanë konsideruar një fitore të madhe, tërheqjen e policisë pas orëve të tëra përplasjesh dhe tensioni. Rreth orës 21.40 forcat e policisë së Tiranës dhe ato të FNSH-së janë larguar duke bërë që godina e Teatrit Kombëtar të pushtohet nga artistët dhe qytetarët që i mbështesin. Nuk dihet nëse ende nëse kjo tërheqje do të jetë momentale apo ndonjë taktikë për të larguar protestuesit nga ambientet e Teatrit Kombëtar.
Regjisori Edmond Budina u shpreh pas tërheqjes së policisë se protestuesit do të vijojnë të qëndrojnë aty derisa kjo qeveri të rrëzohet dhe Teatri të rikonstruktohet dhe jo të shembet. Ai ka falënderuar protestuesit, teksa ka paralajmëruar se nuk do të tërhiqet.
"Politikanët shkojnë e vijnë, qytetarët mbeten. Në duhet ta drejtojmë demokracinë. Këtej e tutje mos na lini vetëm. Prej një viti e gjysmë që jemi natë për natë dhe kemi 5 net që po e gdhijmë këtu. Ju falënderoj me shpirt që jeni këtu. Ne do të jemi këtu deri në fund, derisa sa të bjerë kjo qeveri dhe të rikonstruktohet ky teatër. Ne nuk tërhiqemi", - u shpreh Budina. ©LAPSI.al
