Autoritetet italiane kanë goditur një rrjet të trafikut të drogës nga Shqipëria. Mediat italiane shkuajnë se 17 persona janë arrestuar në Bolonja, nga të cilët 7 janë shqiptarë, 9 italianë dhe një nigerian për trafik droge. 10 shqiptarë të tjerë janë shpallur në kërkim.
Në operacioni janë sekuestruar 1.6 ton kanabis dhe 2 kg kokainë. Sipas medieve italiane droga ishte transportuar nga Shqipëria në drejtim të brigjeve të vendit fqinj.
Trafikantët blinin me shumicë kanabisin në Shqipëri me një çmim rreth 800 euro kg dhe e shisnin më pas në Itali me 2000 deri në 2500 euro kg. Droga shpërndahej më pas nga shqiptarët dhe marokenët në qytete të ndryshme të Italisë.
Banda komunikonte me kode, ndërsa policia arriti në gjurmët e tyre pasi prangosi një maroken, i cili tregoi më pas se kanabisin e kishte blerë nga shqiptarët jashtë një qendre tregtare në Bolonja.
