Partia Socialiste sapo ka dorëzuar në Gjykatën e Tiranës kërkesën për njohjen e mandatit të Agim Kajmakut, kandidatit të Partisë Socialiste për postin e kryebashkiakut në Vorë, në zgjedhjet vendore të 30 qershorit.
Ashtu sikurse në rastin e kryebashkiakes së konfirmuar në Durrës, Valbona Sakos, PS ka kërkuar rishqyrtimin e mandatimit të Kajmakut në një proces tjetër me një gjykatës të ri. Hedhja e shortit pritet të bëhet të hënën e ardhshme për të caktuar gjyqtarin e ri të çështjes.
Më datë 15 korrik, Gjykata e Tiranës shpalli moskompetencën për të dhënë një vendim mbi ligjshmërinë e mandatit të Agim Kajmakut për të drejtuar Bashkinë e Vorës.
Në vendimin e trupës gjykuese, firmosur nga gjyqtarja Ariana Gunbardhi, arsyetohet se kjo kompetencë i kalohet Gjykatës Administrative.
