Komisioni i Pavarur i Kualifikimit (KPK) ka shkarkuar nga detyra gjyqtarin e Tiranës, Ilir Mustafajn, që prej më shumë se një viti, ishtë në pritje për t’u bërë gjyqtar i Gjykatës Kushtetuese.
Gjatë seancës dëgjimore, Mustafaj kërkoi dhe ndërrimin e trupit gjykues për shkak të konfliktit që kishte me relatoren Xhensila Pine, por kjo kërkesë u rrëzua. Pas vendimit të KPK-së, gjyqatri u shpreh se vendimin do ta ankimojë në instancat më të larta.
“Dua ti them opinionit publik se Ilir Mustafaj është një gjyqtar me 23 vite karrierë në sistemin e drejtësisë. 23 vite profesor i së Drejtës, botues i shumë librave brenda dhe jashtë vendit dhe mbajtës i të vetmit titull Profesor Doktor në sistemin e drejtësisë.
Unë kam mbështetur fort reformën në drejtësi, institucionin e vetingut gjithçka që është bërë në të mirë të drejtësisë por sot kundërshtoj fort këtë vendim të komisionit që është marrë në kundërshtim me provat, ligjin dhe Kushtetutën e Shqipërisë.
Me vendimin e sotëm të Komisionit nuk ka humbur Ilir Mustafaj si individ, pasi Mustafaj do e ankimojë vendimin në instanca më të larta dhe jam i bindur që ato do të vendosin pro drejtësisë së tij. Por sot ka humbur vendi. Ka humbur Gjykata Kushtetuese e cila nuk do të ketë në përbërje të saj një gjyqtar të ndershëm, profesional të karrierës dhe një profesor të së drejtës”, tha ai.
Po ashtu, as drejtuesi i Prokurorisë së Rrethit Gjyqësor Vlorë, Ardian Ylli, nuk ka mundur që të kalojë procesin e vetting-ut, për shkak se në analizën financiare, Ylli rezultonte me bilanc negativ dhe me shpenzime të pambuluara me të ardhura të ligjshme.
