Në një takim që po zhvillohet në sallën e hartave në godinën e Kryeministrisë, kreu i qeverisë, Edi Rama, është treguar i ashpër kundrejt drejtorisë së Tatimeve, duke theksuar se fenomeni i informalitetit është rritur, ndërsa dhënia dhe marrja e kuponeve është rikthyer në nivele shumë të ulta.
“Është rritur informaliteti, kush nuk ka rezultat, do të largohet nga sistemi”, deklaroi kryeministri.
“A ma thotë dot dikush nga ju si mundet që të kemi 15 mijë kasa joraportuese në biznese që figurojnë jo aktive, nga 112 mijë të tilla. Kush e mban përgjegjësinë për këtë, kujt i kërkohet ccdo ditë përgjegjësia për këtë.
Kush i mbulon në territor këto pika të kuqe alarmi, dhe si mundet që të vijë dita dhe muaji i ri dhe këto vija të mbeten të kuqe. Pse nuk gjobiten kompanitë e kasave?”, u shpreh ndër të tjera Rama.
Ndërkohë, mësohet se ish-kreun e Përgjithshëm të Tatimeve, Enton Duron, do ta pasojë Delina Ibrahimaj, e cila më parë ka qenë drejtore e Institutit të Statistikave (INSTAT).
Ibrahimaj ka fituar gradën Doktor (PhD) në degën e studimeve “Bankë dhe Financë” nga Universiteti i Romës, Tor Vergata.
Drejtoresha e re e Tatimeve ka punuar në Bankën e Shqipërisë dhe në Kryeministri, si koordinatore për krijimin e një sistemi të integruar shkëmbim informacionesh dhe statistikash operacionale mes instituteve shtetërore.
