Akademia e Shkencave ka reaguar lidhur me vendimin e presidentit të Republikës, Ilir Meta, për refuzimin e emërimit të ish-kreut të Partisë Socialdemokrate (PSD), Skënder Gjinushit, në krye të institucionit shkencor më të rëndësishëm të vendit.
Në një njoftim për mediat, Akademia e Shkencave njofton se është marrë vendimi për mbajtjen e një mbledhjeje të jashtëzakonshme, me qëllim shqyrtimin e propozimit të Këshillit Ekzekutiv për t’i kërkuar kreut të shtetit rikonsiderimin e emërimit të kryetarit të zgjedhur.
Njoftimi i plotë:
Këshilli Ekzekutiv i ASH u mblodh sot më datë 13 korrik 2019 dhe vendosi që më datë 19 korrik 2019, ditën e premte, në orën 11.00 të bëhet mbledhja e jashtëzakonshme e Asamblesë së Akademisë së Shkencave të Shqiperisë me këtë rend dite:
– Njohja me Dekretin e Presidentit të Republikës nr. 11223, datë 11.07.2019, dhe shqyrtimi i propozimit të Këshillit Ekzekutiv drejtuar Asamblesë për të kërkuar rikonsiderimin e emërimit të Kryetarit të zgjedhur nga kjo Asamble.
