Dy komikët rusë që imitojnë ish-presidentin e Ukrainës, Petro Poroshenkon, dhe telefonojnë e fusin në kurth politikanë dhe personalitete të njohura botërore, akuzohen se bashkëpunojnë me shërbimet sekrete.
Të njohur si Leksus dhe Vovan, Vladimir Kusnezov dhe Aleksej Stoljarov, e kanë kthyer Petro Poroshenkon në shënjestër të shakave të tyre dhe në kurth kanë rënë, siç raportohet deri më tani, kryeministri i Maqedonisë së Veriut, Zaran Zaev dhe homologu i tij në Kosovë, Ramush Haradinaj.
Komikët ia kanë dalë madje të telefonojnë edhe senatorin tashmë të ndjerë, John McCain, të ngarkuarin e posaçëm për Ukrainën, Kurt Volker, si edhe Sekretarin e Përgjithshëm të NATO-s, Jens Stoltenberg. Nga kurthet e tyre nuk ka mundur të shpëtojë as presidenti francez, Emmanuel Macron, madje as kreu i shtetit turk, Recep Tayyip Erdogan.
Në shtator të vitit 2015, ata i telefonuan këngëtarit Elton Xhon duke u hequr si presidenti rus, Vladimir Putin, dhe duke i kërkuar që të diskutonin për të drejtat e LGBT-së.
Mënyra sesi përzgjidhen “viktimat”, fakti që në përgjithësi nuk ngacmojnë politikanët rusë apo se kanë akses tek numrat e kontaktit të politikanëve të nivelit të lartë, kanë bërë që të ngrihen dyshimet se ata të dy punojnë për shërbimet sekrete ruse, të jenë të zëshme.
