Ministrja për Marrëdhëniet me Parlamentin, Elisa Spiropali, ka reaguar pas përfundimit të procesit të rinumërimit të kutive nga 11 qendrat e votimit të Lezhës në Komisionin Qendror të Zgjedhjeve (KQZ).
Në një deklaratë nga selia rozë, Spiropali u shpreh se rinumërimi tregoi edhe “njëherë se humbës i zgjedhjeve ishte Lulzim Basha”. “Zgjedhjet kur Basha humbet nuk mund të konsiderohen kurrsesi legjitime, por sot ata morën goditje përfundimtare. Prova më e mirë që nxjerr në dritë mashtrimin e Bashës është rinumërimi i 11 kutive në Lezhë. Kutitë u hapën pas ankesave dhe treguan se nuk ka pasur parregullsi”,- tha zëdhënësja e qeverisë.
Sipas ministres, me zgjedhjet vendore të 30 qershorit, shqiptarët refuzuan mesazhet e opozitës së bashkuar joparlamentare. “Faktet janë kokëforta, rezultatet koordinojnë në mënyrë perfekte me ato të deklaruara në KQZ. E dimë hallin e atyre, por askush nuk i ndihmon. Zgjedhjet ishin ndarja nga e shkuara, pavarësisht kërcënimeve për zjarr e flakë, shqiptarët i refuzuan mesazhet e tyre dhe zgjodhën të ardhmen”,- tha Spiropali.
