Kontrolli i Lartë të Shtetit ka vënë në dyshim cilësinë dhe sigurinë e barnave që hyjnë në tregun farmaceutik shqiptar. Në një raport për periudhën 2017-2018, KLSH vëren se agjencia e barnave nuk ka kryer analizave të medikamenteve që importohen dhe as të atyre të prodhuara nga dy kompani faramceutike në vendin tonë.
Drejtori i Auditimit të Performancës, Rinald Muça, është shprehur se gjatë kësaj periudhe njëvjeçare nuk është bërë asnjë analizë laboratorike, po kështu as për lëndët e para të cilët përdoren për prodhimin e barnave. Më tej, KLSH ka konstatuar se laboratori i agjencisë së barnave është ende i paakreditur. Muça thotë se pajisjet që përmban ky laborator janë të vjetëruara dhe të dala jashtë funksionit.
Për më tepër, KLSH ka konstatuar se agjencia e barnave nuk ka kryer inspektime në të gjitha subjektet farmaceutike tregtare dhe farmacitë e spitaleve, janë lënë plotësisht jashtë kontrollit.
