Këtë të diel mbahen zgjedhjet e gjashta parlamentare në Greqi, në harkun kohor të një dekade.
Ndonëse pësoi dy humbje radhazi në zgjedhjet evropiane dhe ato lokale të fundmajit, kryeministri Alexis Tsipras, u kërkon qytetarëve një shans të ri për të qeverisur, duke theksuar në takimet elektorale se tashmë është “i lirë nga kreditorët e huaj”.
“Ky miting i sotëm çon një mesazh të përmbysjes së rezultatit në të gjithë Greqinë. Le të mos nxitohen të kthehen princërit në fronin e tyre. Populli grek nuk e ka thënë ende fjalën e tij të fundit.”- tha Tsipras . Nga ana tjetër, nisur nga siguria për fitoren, rivali i tij konservator, Kyriakos Mitsotakis , premton investime të reja, taksa më të ulta, paga më të mira dhe përforcim të rendit publik. “Ju kërkoj të më jepni fuqinë që t’i shërbej vendit tim, të bashkoj grekët dhe të qeveris me efikasitet me armën e fuqishme të së vërtetës!”- është shprehur, lideri i “Demokracia e Re”.
Analistët e demoskopëve vlerësojnë se rol kryesor në këto zgjedhje do të luajë vota e shtresës së mesme, e ndikuar në mënyrë të veçantë në vitet e gjata të krizës. Megjithatë, edhe pse “SYRIZA” ka zbatuar disa masa benefitare për shtresat në nevojë, ka një probabilitet të ulët për përmbysjen e rezultatit të pritshëm.
Konservatorët e “Demokracia e Re” po përpiqen të sigurojnë përqindje sa më të madhe votash, me qëllim që të sigurojnë shumicën parlamentare, për të mundur të formojnë rrjedhimisht një qeveri pa partner koalicioni. Në të kundërt, vendi mund të shkojë përsëri në zgjedhje të reja.
