Stambolli i jep goditjen e dytë dhe finale presidentit turk Recep Tayyip Erdogan dhe partisë së tij AKP. Pavarësisht humbjes në raundin e parë, ku triumfoi kandidati i opozitës, Ekrem İmamoğlu i CHP, presidenti turk bëri gjithçka që zgjedhjet të përsëriteshin.
Në zgjedhjet e 31 marsit Ekrem İmamoğlu fitoi me një diferencë të ngushtë prej 0.2%, por Këshilli i Lartë Zgjedhor pranoi kërkesën e partisë së Erdoganit për ripërsëritje të zgjedhjeve, duke pretenduar se pati parregullsi.
Këtë diel u rivotua në Stamboll dhe kutitë e votimit u mbyllën rreth orës 17.00. kur janë numëruar mbi 99% e fletëve të votimit gjithçka është e qartë.
Kandidati i opozitës Ekrem İmamoğlu ka korrur një fitore tjetër këtë herë edhe më të thellë duke marrë 54.03% të votave përballë rivalit, ish-kryeministrit Binali Yildirim që ka siguruar vetëm 45.09% të votave.
Humbja e Stambollit do të ishte një goditje e rëndë për Erdoganin pasi ai konsiderohej si bastion i tij për gati 2 dekada. Në këtë qytet, Erdogan ka qenë kryebashkiak për disa mandate dhe humbja e tij do të ishte akoma më e rëndë pas fitores së opozutës në Ankara dhe disa qendra të tjera të rëndësishme të Turqisë.
Menjëherë pas daljes së rezultateve, Binali Yıldırım, kandidati i AKP e pranoi humbjen dhe përgëzoi publikisht kundërsjtarin.
“Aktualisht, kundërshtari im Ekrem İmamoğlu është duke kryesuar. E përgëzoj dhe i uroj suksese", - tha Yıldırım në një konferencë për media në selinë e partisë së tij në Stamboll, citon Anadolu Agency.
“Zgjedhje do të thotë demokraci. Këto zgjedhje treguan edhe një herë se demokracia në Turqi funksionon në mënyrën më të mirë", - deklaroi Yıldırım.
Ka dalë para mbështetësve dhe gazetarëve edhe Ekrem İmamoğlu. Ai falënderoi qytetarët e Stambollit për “mbrojtjen e traditës demokratike”.
“Pjesa më e rëndësishme e zgjedhjeve të sotme në Stamboll është kontributi që do të kenë në demokracinë e Turqisë. Uroj që rezultati të jetë në dobi për shtetin tonë dhe Stambollin”, - tha İmamoğlu duke folur për mediat në Stamboll.
Kandidati i opozitës turke tha se rezultati i zgjedhjeve nuk është një fitore, por "një fillim i ri për qytetin". ©LAPSI.al
