Presidenti i Shteteve të Bashkuara të Amerikës, Donald Trump, ka deklaruar se kishte hequr dorë nga plani i ndërmarrjes së një goditjeje ushtarake ndaj Iranit, për arsye se një kundërpërgjigje e kësaj natyre ndaj rrëzimit të dronit amerikan prej Teheranit zyrtar, do të shkaktonte vdekjen e një numri të madh njerëzish.
Në një sërë postimesh në llogarinë e tij personale në “Twitter”, Trump tha se pas shkatërrimit të dronit amerikan nga një raketë iraniane tokë-ajër, sanksionet ekonomike ndaj Iranit do të shtohem. I dërguari amerikan për Iranin, Brian Hook, në një vizitë në Arabinë Saudite u shpreh se është e rëndësishme të bëhet gjithçka për të qetësuar gjendjen. “Diplomacia jonë nuk i jep të drejtën Iranit që të përgjigjet me forcë ushtarake dhe Irani duhet t’i përgjigjet diplomacisë sonë me diplomaci, jo forcë ushtarake”, tha Hook.
Kreu i Divizionit të Hapësirës Ajrore të Gardës Revolucionare iraniane, Amirali Hajizadeh, mohoi pretendimin e palës amerikane për mosdijeni të sulmit, duke thënë se Teherani kishte dërguar dy sinjale paralajmëruese 10 minuta para se të lëshohej raketa. “Ata që kontrollonin dronin, i dëgjuan paralajmërimet por nuk u kushtuan vëmendje. Duke pasur parasysh se droni kishte shkelur kufijtë tanë, ai u vu në shënjestër nga raketa tokë-ajër e divizionit ajror të Gardës Revolucionare dhe u godit”, tha Hajizadeh. Por, Uashingtoni zyrtar këmbëngul se droni gjendej mbi ujra ndërkombëtare.
Vendimi i Trump për t’u tërhequr nga goditjet ushtarake ndaj Iranit, ka shmangur një konflik të mundshëm të armatosur, që do të përfshinte pjesën më të madhe të Lindjes së Mesme.
