Presidenti i Shteteve të Bashkuara të Amerikës, Donald Trump, ka njoftuar se sekretarja e shtypit e Shtëpisë së Bardhë, Sarah Sanders, do të largohet nga detyra në fund të muajit qershor. Përmes një postimi në llogarinë e tij personale në “Twitter”, Trump bëri me dije se Sanders kishte vendosur të kthehej në vendlindjen e saj në Arkansas, pas një përvoje dhe pune të vlerësuar me superlativa në postin e zëdhënëses së tij.
“Ajo është një person shumë i veçantë, me talent të jashtëzakonshëm, e cila ka bërë një punë të pabesueshme”, shkroi kreu i Shtëpisë së Bardhë, duke shtuar se do të shpresonte që Sanders do të shpallë kandidaturën për Guvernatore të Arkansasit.
Sanders nisi punën si zëvendës-sekretare e shtypit përpara se të zëvendësonte Sean Spicer-in, më 2017-n si sekretare e shtypit, duke u rritur kështu në detyrë. 36-vjeçarja është shquar si një nga mbrojtëset më të përkushtuara të politikave të Presidentit. Madje, ndër të tjera, ajo ka deklaruar se “Zoti donte që Donald Trump të bëhej president”.
