Neymar po kalon një nga momentet më të vështira në jetën e tij si edhe në karrierë duke qenë se pak ditë më parë u akuzua nga një modele për përdhunim ndërkohë që mbrëmjen e djeshme u dëmtua sërish dhe humbi Kupën e Amerikës. Vetë Neymar ka hedhur poshtë çdo akuzë duke publikuar foto intime të akuzueses dhe duke pranuar se ishte dëshira e modeles për të shkuar në hotel.
Por ndërkohë që të gjithë po flasin për këtë skandal, ka folur vetë Najila Trindade e cila ka zbardhur edhe të vërtetën e ngjarjes, të paktën siç ajo vetë pretendon. 26-vjeçarja u shpreh se kishte shkuar deri në Paris për të takuar Neymarin dhe për të kaluar natën me të por ky i fundit e kishte përdhunuar.
“Isha viktimë e një përdhunimi. Jam një person normal që punon, studion dhe një modele dhe stiliste që pëlqen sportin, stërvitjen dhe kërcimin. Erdha në Paris me ëndrrën që të bëja seks me Neymarin por ai ishte agresiv dhe plotësisht ndryshe nga Neymari që kisha njohur në rrjetet sociale.
E pyeta nëse kishte marrë masa mbrojtëse dhe më tha që nuk kishte marrë. Aty i bëra me dije se nuk do të ndodhte asgjë pa masa por ai u bë agresiv dhe nisi të më dhunonte deri sa e mori atë që donte. Është çështje nderi, jam e traumatizuar. Dua që ai të paguajë për atë që më ka bërë”, tha modelja.
