Zonja e parë e Izraelit, Nehama Rivlin, 73 vjeçe, ka ndërruar jetë në orët e para të mëngjesit të sotëm, pas një beteje të gjatë kundër një sëmundjeje respiratore.
Rivlin vuante nga "fibroza pulmonare", që kërkon detyrimisht përdorimin e pandërprerë të bombulës së oksigjenit, pajisje me të cilën është parë edhe gjatë ceremonive zyrtare, ku merrte pjesë së bashku me të shoqin, presidentin Reuven Rivlin.
"Në emër të të gjithë qytetarëve të Izraelit dhe bashkëshortes sime Sara, shpreh keqardhjen time të thellë për vdekjen e bashkëshortes së presidentit, Nehama Rivlin", u shpreh kryeministri izraelit, Benjamin Netanyahu.
Rivlin ka lindur në Moshav Herut, një komunitet bujqësor në qendër të Izraelit. Prindërit e saj, Drora dhe Mendi, ishin emigrantë të ardhur nga Ukraina.
Në vitin 1971, e ndjera u martua me presidentin Rivlin dhe jetoi së bashku me të në Jeruzalem.
