Punimet në autostradën Tiranë-Elbasan vijojnë ende, duke tejkaluar afatin e fundit të parashikuar për përfundimin e ndërtimit të aksit në mes të muajit maj. Sipas Autoritetit Rrugor Shqiptar (ARRSH), vonesat për hapjen e plotë të të dyja korsive të autostradës, kanë ndodhur për arsye teknike, siç është p.sh. shtrimi i asfaltit, që është shtyrë si pasojë e motit me reshje të shumta. Ndërkohë, ARRSH-ja bën me dije se në terren po punohet me intensitet dhe se hapja e autostradës do të bëhet së afërmi.
Ndërtimi i autostradës Tiranë-Elbasan ka nisur që në vitin 2011 dhe kohëzgjatja e punimeve ishte parashikuar të përmbyllej në pak vjet. Në vitin 2013, qeveria Berisha inauguroi vetëm çeljen e Tunelit të Kërrabës. Për shkak rritjes së kostove, punimet u ndërprenë, ndërkohë që në vitin 2014, një shembje në afërsi të Ibës, ngadalësoi edhe më tej ritmin e ndërtimit.
Ndërsa, në vitin 2016, qeveria Rama mori një tjetër borxh shtesë. Në këtë mënyrë, kostot janë rritur në përpjestim të drejtë me shtyrjen e punimeve. 7 vjet më pare, autostrada Tiranë-Elbasan u tenderua me 300 milionë dollarë, ndërkohë që në ditët që flasim ka arritur një vlerë rreth 425 milionë dollarë për 31 kilometra.
