Policia greke ka vënë në pranga një shtetas shqiptar, 27 vjeç, i cili akuzohet për kryerjen e një sërë grabitjeve në zonën periferike të Zografu-së. Sipas informacioneve paraprake të bëra të ditura nga Policia, 27-vjeçari plaçkiste në mënyrë sistematike një agjenci të lojrave të fatit në Zografu, duke kërcënuar punonjësit me armë zjarri.
Pas kontrollit të ushtruar në banesën e të ndaluarit, forcat policore kanë gjetur dhe sekuestruar në cilësinë e provës materiale 1 pistoletë, 18 fishekë, një thikë xhepi dhe një shumë të hollash prej 445 eurosh.
Deri tani nga hetimet janë zbuluar 5 raste të plaçkitjeve, që përllogaritet të kenë shkaktuar një dëm prej rreth 10,000 eurosh. Shqiptari është dërguar në Prokurorinë publike të Athinës, ndërkohë që vijojnë hetimet për zbardhjen e grabitjeve të tjera.
