Ministri i Jashtëm i Republikës së Kosovës, Behgjet Pacolli, ka reaguar ndaj deklaratës fyese të kryeministres serbe, Ana Brnabiq ndaj shqiptarëve të Kosovës. Sipas raportimeve të mediave serbe, gjatë një konference shtypi të mbajtur sot në Beograd me kreun e delegacionit të Bashkimit Europian në Serbi, teksa ka folur mbi zhvillimet e fundit në raportet me Kosovën, Brnabiq ka përdorur një fjalor stigmatizues duke thënë shprehimisht se “keni punë me njerëz të cilët faktikisht kanë dalë nga mali. Për ata është njësoj nëse atje ka luftë ose jo, dhe kjo më shqetëson”.
Ndërkaq, Pacolli, në një postim në llogarinë e tij personale në “Facebook”, shkruan se përgjatë shërbimit të tij si kryediplomat, nuk do të lejojë që kreu i ekzekutivit serb të mund të hyjë në Kosovë për sa kohë ndjek një ideologji raciste.
Postimi i Pacollit në Facebook:
“I pështirë dhe krejtësisht të papranueshme komentet e Kryeministres serbe Ana Brnanic në prani të shefit të Delegacionit të BE-së në Serbi Sem Fabrizi ndaj Kosovës ‘që kemi të bëjmë me njerëzit që vijnë nga mali’.
Ky racizëm i institucionalizuar në Serbi, që ka brumin në ideologjinë ultranacionaliste të sëmurë që promovon Qeveria e Ana Brnabicit.
Shpresoj që Evropa sot të kuptojë se me çfarë lloj njerëzish kemi të bëjmë, me ata që kanë mbështetur vrasjet masive dhe mohojnë krimet e luftës të kryera nga Beogradi në ish-Jugosllavi.
E them me përgjegjësi që sa të jem unë ministër i jashtëm i Republikës së Kosovës, nuk do të lejojë që Kryeministrja serbe të hyjë në Kosovë, për sa kohë që ajo të ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu.”- ka shkruar Pacolli.
