Kreu i Partisë Liberal Demokratike të Serbisë (LDP), Çedomir Jovanoviç, i ka kërkuar presidentit Aleksandër Vuçiç që të vazhdojë negociatat për zgjidhjen e çështjes së Kosovës, duke vënë theksin tek nevojshmëria e paqes në rajon. “Ne nuk kemi më kohë. Duhet të vazhdoni negociatat. Sepse ne kemi nevojë për paqe, e jo për territore.”- u shpreh Jovanoviç, në seancën plenare të Kuvendit të Serbisë, ku Vuçiç raportoi mbi marrëdhëniet dhe dialogun e ndërprerë me Kosovën.
Sipas raportimeve të mediave serbe, lideri i liberal-demokratëve bëri thirrje që të gjithë aktorët e jetës politike të kontribuojnë në arritjen e një marrëveshjeje që do të mundësonte normalizimin e marrëdhënieve bilateral dhe rivendosjen e dialogut me Kosovën. “Ju lutem më tregoni se çfarë të bëj unë që populli ynë dhe fëmijët tanë të gjejnë paqe dhe lumturi. Ne në Kosovë mund të fitojmë atë që kurrë nuk kemi pasur – paqen me shqiptarët, por para kësaj ne duhet të gjejmë paqe me veten tone.”- tha Jovanoviç.
