Shkollat në Afganistan po shkatërrohen totalisht nga lufta, zbulon raporti i fundit i publikuar nga UNICEF. Në raportet e bëra nga organizata që mbron të drejtat e fëmijëve në botë, të martën përmenden rreth 200 sulme mbi shkollat që kanë ndodhur për një vit të vetëm dhe vetëm gjatë vitit 2018, sulme që kanë sjellë uljen e qasjes së fëmijëve në arsim.
Sulmet mbi shkollat, thotë UNICEF-i, janë rritur nga 68 në vitin 2017 në 192 në vitin 2018.
Përveç kësaj, mbi 1.000 shkolla u mbyllën vitin e kaluar, me çka kanë privuar gjysmë milion fëmijë të ndjekin procesin arsimor.
“Arsimi në Afganistan është i kapluar nga sulmet. Sulmet e pakuptimta mbi shkollat, vrasjet, plagosjet dhe rrëmbimet e mësuesve si dhe kërcënimet që po i bëhen arsimit, po shkatërrojnë shpresat dhe ëndrrat e një brezi të tërë fëmijësh”, tha drejtoresha Ekzekutive e UNICEF-it, Henrietta Fore.
Raporti thekson se një nga arsyet për rritjen e sulmeve, ishte fakti se shkollat u përdorën për regjistrim të votuesve dhe qendra të votimit për zgjedhjet parlamentare në vitin 2018.
Raporti thotë se ka verifikuar 435 viktima civile, 56 vrasje dhe 379 të plagosur gjatë fushatës.
Sipas raportit të UNICEF-it, rreth 3.7 milionë fëmijë të moshave mes 7 dhe 17 vjeçe, gati gjysma e të gjithë fëmijëve të moshës shkollore në vend, janë jashtë procesit mësimor.
Muajin e kaluar, një i armatosur hodhi në ajër shkollën e vajzave në provincën Farah. Incidentit i parapriu vrasja e një mësuesi në provincën veriore Faryab më parë atë muaj.
