Pak orë para fillimit të protestës së opozitës, ambasada e Shteteve të Bashkuara të Amerikës në Tiranë, u bën thirrje protestuesve dhe forcave ligjzbatuese për vetëpërmbajtje, duke theksuar se nxitja e përplasjeve fizike apo hedhja e mjeteve plasëse, përbëjnë akte jodemokratike dhe të paligjshme.
Në një postim në faqen zyrtarë në rrjetin social “Facebook”, ambasada amerikane nënvizon se personat që përfshihen në akte dhune, kryejnë një krim dhe për këtë arsye duhen vënë para përgjegjësisë.
“Shtetet e Bashkuara respektojnë të drejtën demokratike të qytetarëve për të protestuar në mënyrë paqësore.
Ju bëjmë thirrje të gjithë pjesëmarrësve në protestën e sotme – si qytetarëve ashtu edhe forcave ligjzbatuese – që të përmbahen duke qëndruar larg dhunës. Nxitja e përplasjeve fizike apo hedhja e mjeteve plasëse, bombave molotov dhe gurëve, është jodemokratike dhe e paligjshme.
Ata që përfshihen në akte dhune kryejnë një krim dhe duhen vënë përpara përgjegjësisë. Shtetet e Bashkuara nxisin të gjitha palët të tregojnë vetëpërmbajtje, të refuzojnë dhunën dhe të përfshihen në një dialog konstruktiv.”- shkruhet në postimin e ambasadës në “Facebook”.
