Ministri i Jashtëm meksikan, Marcelo Ebrard, ka njoftuar se ditën e enjte do të zhvillojë një takim me Sekretarin amerikan të shtetit, Mike Pompeo-n. Në fokus të tryezës së bisedimeve do të jetë plani masiv i zhvillimit ekonomik i propozuar nga Meksika, që synon parandalimin e migrimit të jashtëligjshëm. “Teza jonë është se nëse nuk investoni në Amerikën Qendrore në një shkallë më të madhe, veçanërisht në Guatemalë, Honduras dhe El Salvador, rrjedha e emigrantëve nuk do të ndryshojë.”- u shpreh Ebrard në një dalje publike, duke lajmëruar edhe udhëtimin e tij drejt Ëashington-it.
Ndërkaq, presidenti i Shteteve të Bashkuara të Amerikës, Donald Trump, deklaruar dje Meksika do të mbajë përgjegjësi për mosparandalimin e migrantëve të jashtëligjshëm që mbërrijnë në tokën amerikane përmes kufirit jugor. “Qëndrimi i Meksikës është se njerëzit nga vende të tjera, përfshirë Meksikën, duhet të kenë të drejtën të hyjnë në SHBA dhe që taksapaguesit amerikanë duhet të jenë përgjegjës për shpenzimet e mëdha që lidhen me migrimin ilegal. Meksika është gabim dhe së shpejti do të jap një përgjigje.”- shkruante Trump në një postim në llogarinë e tij në “Twitter”.
Trump ka kërcënuar vazhdimisht Meksikën me mbylljen e kufirit gjatë 2 vjetëve të tij në krye të Shtëpisë së Bardhë, me synimin për të ndalur fluksin e migrantëve të papajisur me dokumenta, që sipas tij përbëjnë një nga burimet kryesore të rritjes së kriminalitetit në SHBA.
