Vangjush Dako, kreu i Bashkisë së Durrësit, është thirrur në Prokurorinë e Krimeve të Rënda, ku ka dhënë dëshminë mbi “Dosjen 339”, që ka të bëjë me përgjimet për dyshimet lidhur me shitblerjen e votës në zgjedhjet e fundit të përgjithshme në qershor të vitit 2017.
Ditën e sotme është refuzuar kërkesa për lirim e Altin Avdylit, të njihur ndryshe si “Niçja”, i cili ka mbetur në arrest me burg. Mësohet se kryebashkiaku Dako është marrë në pyetje në cilësinë e personit që është në dijeni, ditën e enjte nga ora 15 deri në orën 20.
Gjatë seancës së drejtuar nga prokurorët Vladimir Mara dhe Dritan Premçi janë marrë në pyetje edhe drejtues të tjerë lokalë. Janë zbardhur mjaft përgjime, ndërkohë që siç ka bërë me dije kryeprokurorja Arta Marku, 700 CD kanë mbetur të pazbardhura.
Hetimet janë regjistruar për një sërë veprash penale, që variojnë nga trafiku i drogës e deri tek manipulimi i zgjedhjeve. Në përgjime kanë dalë edhe emra gjyqtarësh dhe prokurorësh.
