Presidenti i Kosovës, Hashim Thaçi, e ka cilësuar si punën më të mençur që mund të bëjë Kuvendi, krijimin e Tribunalit për gjenocidin serb, të iniciuar nga kryetari i Kuvendit, Kadri Veseli.
Thaçi ka kërkuar bashkimin e të gjithëve për të dënuar gjenocidin serb në Kosovë. Ai ka kërkuar përballjen e autorëve të krimeve me drejtësinë.
“Debati i sotëm dhe mundësia e nxjerrjes së rezolutës dhe formimi i një komisioni janë punët më të mençura të mundshme që mund të bëjë kuvendi i Republikës së Kosovës . Është një ide shumë e mirë e kryetarit Veseli dhe besoj që të gjithë do të jenë së bashku të dënojnë gjenocidin, spastrimin etnik të Serbisë, dhe njerëzit që kanë kryer këto krime, njerëzit e aparatit shtetëror të Serbisë të dalin para drejtësisë”, tha ai.
