Përfaqësues të qeverisë dhe të opozitës së Venezuelës kanë udhëtuar drejt Norvegjisë për të negociuar një zgjidhje që do të mundësonte kapërcimin e krizës politike dhe ekonomike, që ka ngërthyer vendin. Në tryezën e bisedimeve, qeveria e presidentit Nicolas Maduro përfaqësohet nga ministri i Informacionit, Jorge Rodriguez, ndërsa nga fronti opozitar është përzgjedhur deputeti Stalin Gonzales.
Negociatat po mbahen si rezultat i dështimit të grushtit të shtetit të planifikuar më datë 30 prill nga udhëheqësi i opozitës dhe njëkohësisht presidenti i vetëshpallur i Venezuelës, Juan Guaido, për të rrëzuar nga pushteti kreun e shtetit në detyrë, Maduro-n. Kriza politike që ka ngërthyer Venezuelën daton në maj të 2018-s, kur kreu i shtetit, Maduro, i cili ka shërbyer në këtë post që prej vitit 2013 përgjatë tatëpjetës së treguesve ekonomikë, siguroi një tjetër mandat 6-vjeçar, pasi fitoi zgjedhjet presidenciale të denoncuara nga opozita dhe bashkësia ndërkombëtare si të manipuluara.
Në janar të vitit 2019, Guaido vetëdeklarohet president i përkohshëm në një prej protestave anti-qeveritare gati periodike. Njohja e Guaido-s si president i Venezuelës nga administrata Trump, u pasua nga zyrtarizimi i këtij lideri të ri edhe prej shumicës së vendeve të Amerikës Latine dhe të Evropës Perëndimore, ndërkohë që presidenti Maduro gëzon ende mbështjetjen e Rusisë, të Kinës dhe të Kubës. Opozita venezueliane ka organizuar shpesh protesta të mëdha në rrugë kundër Maduros, por nuk ka mundur ta largojë atë pavarësisht recesionit të thellë ekonomik dhe hiperinflacionit.
