Ministria e Brendshme e Spanjës ka njoftuar arrestimin sot në Francë të ish-liderit të organizatës separatiste baske, ETA, i cili ishte arratisur që prej vitit 2002. Bëhet fjalë për Jose Antonio Urrutikoetxea Bengoetxea.
”I njohur më tepër me emrin e Josu Ternera, ish-lideri politik i ETA-s, organizatës aktualisht të shpërbërë pas katër dekadash akte dhune, u arrestua në orët e para të mëngjesit të sotëm në Sallanches, në Alpet franceze, në një operacion të përbashkët me Drejtorinë e Përgjithshme të Sigurisë së Brendshme franceze”, sqaron Ministria në një komunikatë.
ETA ka vrarë mbi 800 persona në një fushatë atentatesh për pavarësinë e shtetit bask.
Policia spanjolle e kishte shpallur në kërkim që nga viti 2002, për rolin e tij në një atentat kundër një kazerme të Gardës Civile në Saragosa, në veri të Spanjës, ku mbetën të vrarë 11 persona përfshirë pesë fëmijë, në 1987.
