Gjykata Apelit për Krime të Rënda ka lënë në fuqi dënimin me 2 vjet burg për punonjësit e doganës, Gëzim Dervishin dhe Agron Kapllanin, që trafikuan 2.5 ton drogë drejt Italisë rreth dy vjet më parë. Ndërsa, për punonjësin tjetër, Mihal Hilën, u vendos pezullimi i dënimit të mbetur duke kaluar në shërbim prove.
Apeli la në fuqi edhe dënimin me 15 vjet burg për trafikantët, Euron Hotin dhe Malton Lleshajn, ndërsa bashkëpunëtori i drejtësisë, Aurel Lazaj, do të vuajë dënimin e reduktuar prej dy vjetësh burg. Në rrrëfimin e tij, i penduari Lazaj sqaroi mekanizimin e trafikut, personat e përfshirë në të, si edhe ndihmën e zyrtarëve të policisë apo të doganës. Lazaj tregoi edhe për përfshirjen e tij në trafikun e lëndës narkotike “cannabis-sattiva”-s , që kalonte kufirin e mbartur në kamionët që transportonin mermer.
Sipas organit të akuzës, kamioni me 2.5 tonë “cannabis-sattiva” u bllokua në Ankona, për shkak të një problemi që u konstatua me dokumentacionin. Në këto rrethana, të pandehurit dërguan një tjetër kamion me synim ndërrimin e targave dhe shkëmbimin e tyre, orvatje që u zbulua nga Policia italiane, që më pas gjeti dhe sekuestroi sasinë e drogës. Nga hetimet rezultoi se Euron Hoti ishte pritës i drogës në Gjermani.
