Ambasadori i Austrisë në Tiranë, Johan Sattler, ka komentuar aktualitetin politik në vend në një dalje publike nga qyteti i Patosit. Sattler është shprehur se protesta është një e drejtë legjitime e qytetarëve, teksa vëren se ka ardhur koha që partitë politike t’i rikthehen dialogut. “Qytetarët kanë të drejtë të protestojnë. E dënojmë dhunën, është koha të mendojmë për dialog politik dhe të funksionojë dialogu. Deklarata e peshkopëve katolikë duhet të inkurajojnë politikanët ta shikojnë këtë deklaratë.”- tha për mediat Sattler.
Përfaqësuesi diplomatik i Austrisë në Shqipëri, bëri thirrje që të ndryshohet retorika politike, duke shprehur gatishmërinë e ndërkombëtare për të kontribuar në kapërcimin e krizës politike. “Të ndalojnë retorikën e dhunës dhe të urrejtjes sepse urrejtja sjell vetëm urrejtje. Retorika duhet të ndryshoje. Përfaqesuesit ndërkombëtarë janë në vend për të ndihmuar por përgjegjësia bie mbi vet drejtuesit e vendit.”- tha ndër të tjera Sattler.
