Në konferencën e sotme të mbajtur me gazetarë, kryeministri Edi Rama, është pyetur edhe lidhur me mosrikandidimin e kreut të Bashkisë së Durrësit, Vangjush Dakos dhe të kryebashkiakut të Elbasanit, Qazim Sejdinit, për zgjedhjet vendore të 30 qershorit.
Rama u shpreh se përgjimet e dosjes 339, janë thjesht “muhabete telefonash” që nuk dëshmojnë se Dako ka bashkëpunuar me grupin kriminal për manipulim të procesit zgjedhor, duke hequr paralele edhe me "precedentin" e përgjimeve për ish-ministrin e Brendshëm, Saimit Tahiri. “Nuk më rezulton të ketë dalë ndonjë përgjim për Vangjush Dakon, mua më rezulton të kenë dalë disa përgjime në thyerje të sekretit hetimor për një grup kriminal dhe mes atyre përgjimeve ka nja dy referenca, por mes tyre dhe nja dy komunikime që nuk tregojnë asgjë për Vangjush Dakon...Më detyroni të kthehem përsëri tek përgjimet që ishin një kazan i madh llafesh mes ca horrave dhe për të cilat u kërkua 24 orë burgosja e Saimir Tahirit. Nuk u nxor asnjë mësim nga fakti që gjithë ajo vorbull në raport me personin që u kërkua të futej në burg brenda 24 orësh rezultoi asgjë sipas prokurorisë së Antimafias italiane.”- tha Rama.
Sipas kreut të qeverisë, moskandidimi i dy kryebashkiakëve në fjalë ishte kërkesë e tyre, e argumentuar me faktin se 3 mandate, 12 vjet në krye të dy bashkive të mëdha janë shumë. “Thënë këto zëvendësimi qoftë i Dakos qoftë i Sejdinit në Elbasan jeni të lirë ta besoni apo jo është kërkesë e tyre. Prej kohësh 3 mandate, 12 vjet në krye të dy qyteteve të rëndësishme, janë shumë.”- u përgjigj kreu i qeverisë.
