Një tjetër kandidat nga listat shumëemërore të Partisë Demokratike, është paraqitur në Komisionin Qendror të Zgjedhjeve për të dorëzuar formularin e dekriminalizimit, në kërkim të marrjes së mandatit të deputetit. Mësohet së bëhet fjalë për Valter Halitin, i cili në zgjedhjet e fundit qendrore të vitit 2017, garonte i renditur si kandidat në listat e PD-së për Qarkun e Tiranës.
Sakaq, javën e kaluar, Selami Jenisheri, kryetari i Partisë së Bashkimit Popullor të Pensionistëve, paraqiti po ashtu në KQZ formularin e dekriminalizimit, duke iu shtuar grupit të ish-aleatëve të kreut të PD-së, Lulzim Basha, që janë bërë pjesë e Kuvendit pas vendimit të opozitës për djegien e mandateve. Ata janë dy kryetarët e Partive të Ballit, Artur Roshi dhe Adriatik Alimadhi, kreu i Partisë Konservatore, Kujtim Gjuzi, kryetari i Partisë Demokracia e re Europiane, Koçi Tahiri, drejtuesi i Partisë Ora e Shqipërisë, Zef Shtjefni, si edhe Nikolin Staka, lideri i Lëvizjes Demokratike për Ndryshim.
Aktualisht Kuvendi numëron 120 ligjvënës. Pas konfirmimit dhe vlerësimit nga KQZ-ja, Haliti pritet të bëjë betimin procedurial në Parlament.
