Një adoleshent është vrarë dhe shtatë të tjerë janë plagosur pasi dy persona qëlluan me armë zjarri në një shkollë në Shtetet e Bashkuara.
Sulmi në shkollën Highlands Ranch afër Denver në Kolorado, ka ndodhur të martën dhe sulmuesit janë arrestuar, ka njoftuar policia.
Kjo shkollë gjendet vetëm 8 kilometra larg shkollës së mesme, Columbine, e cila ka qenë shënjestër e një prej sulmeve më të këqija në shkollat amerikane 20 vjet më parë.
Sulmi i fundit konsiderohet se ka shënuar sulmin e 115-të masiv me armë zjarri në Shtetet e Bashkuara gjatë këtij viti.
Guvernatori i Kolorados, Jared Polis ka thënë përmes një postimi në Tëitter se do të dërgojë forca policore shtesë në vendin e ngjarjes.
Shtëpia e Bardhë po ashtu ka shprehur ngushëllime për viktimat, ndërsa zëdhënësi Judd Deere ka thënë se presidenti amerikan, Donald Trump “është njoftuar dhe vazhdon të monitorojë situatën”.
